| Source : FRAD029 16 J 37, Chartrier du Guilguiffin, 1 parchemin
Déclaration et pièces des terres, héritaiges, rantes et droicts que escuyer Allain du Lendrein, sieur de Quoetforn, Brenilleau etc. tient en prochaine seigneurie de ligence à foy, homaige et debvoir de rachapt quand dû est, soubs hault et puissant Jan de Carné, chevallier de l'Ordre du Roy, seigneur baron de Bleson, dudict lieu de Carné, Coetcanton etc. à cause de ladicte seigneurye de Coetcanton.
Scavoir
Le lieu et manoir de Kerourriou o ses moulin à eau, colombier, bois de haulte fustaye et aultres yssues et apartenances, contenant environ vingt et cincq journaulx de terre chaude et environ dix journaulx de terre froyde et cincq journaulx soubs pré fauchable.
Quel lieu et manoir est tenu et profilté boy? partie à tiltre de ferme soubs ledict sieur de Quoetforn par Allain Le Maou et Pierre Le Cornec :
Scavoir, ledict Maou cincquante souls monnoie, deux minots fourment, deux minots foulés avoine et troys chappons.
Et ledict Cornec quatre Livres monnoie, quatre minots fourment, quatre minots foulés avoine et six chappons.
Et le reste dudict manoir est en friche à présent et a esté tenu et profilté dernièrement à pareil tiltre par Jan Flatrès et Deniel Lorvillon
Et pour debvoir poyer l'an :
Scavoir, ledict Flatrès quatre Livres monnoie, deux minots fourment, deux minots avoine et quatre chappons et ledict Orvillon quatre Livres monnoie, deux minots fourment, deux minots combles foulés avoine et quatre chappons.
Et ledict moulin est aussy chômant et souloit estre afermé quatre escus l'an.
Quel manoyr o sesdites yssues et apartenances, a, ledict Lendrein recueilli de la succession de deffunct escuyer Julien Quoetforn, sieur en son vivant dudict lieu, son oncle maternel, décebdé sans hoyr de corps puis sept ans derniers.
Et ce pour debvoir payer de chefrante chacun an audict seigneur de Carné ou à ses recepveurs, commis ou députés la somme d'un obole monnoie chacun dernier dimanche de janvier.
À caus desqueulx heritaiges aussy cognoit et confesse ledict sieur de Quoetforn debvoir obéir audict seigneur de Carné audict nom ou à sa court selon la nature du fyé.
Et quant afin de faire homaige de bouche et des mains et de bailler et de présenter cestes a, ledict sieur de Quoetforn, nommé et institué Me Pierre Lor, promectant par son sermant avoir ferme, establi et agréable tout ce que par ledict procureur sera faict et procuré soubs obligation et hipothèque de touts et chacuns ses biens meubles et héritaiges présents et futurs et par son serment.
Et ce que dessus, ledict sieur de Coetforn présent en personne devant nous notaires royaux de la Court de Concq, Foenant et Rospreden dict et affirme estre vroy et contenir véritté ; promectant, sur pareille obligation et serment que devant, n'en venir jamais encontre.
À quoy faire et thenir nous l'avons, à sa requeste et de son serment, condempné et le comdempnons par nostredicte court et soubs le sceau d'icelle à cestes apposé.
Ce fut faict et gréé au bourg de Rospreden au tablier de Me Hierosme Lor notaire soubsignant, soubs le signe dudict sieur de Coetforn, le quattriesme jour de juillet an mil six cents deux, apprès midy.
[Signatures de : ]
Alain du Lendrein
H. Lor, notaire royal
P. Lor, notaire royal
En l'auditoire de Rospreden ès revenants? des plects generaulx de la Jurisdiction de Coetcanton thenue par Monsieur le sénéchal d'icelle, Me Pierre Lor procureur pour escuyer Allain du Landrein à présenté le mynu cy-dessus à Monsieur le procureur fiscal de la Court ; lequel l'a reczu, sauff à l'impunir et réservation des droicts du seigneur [de Coetcanton ?]
Faict le cinquiesme juillet 1602.
[signatures de : ]
H. Lor, greffier de la Court [le même que ci-dessus]
Chiffré? et controllé?
1231 ? - 4 pièces
Poulizac commis juré
|
