| Source : FRAD044 B 1212, parchemin
[au revers]
1538
Rospredan
Tenue de la maison de
Kerverniou paroisse d'Ilian
à la charge de 25 s. de rantes
3 quarterons fourmant
[folio unique]
1538
xxxvii
Saichent touts que par nostre Court de Rospreden endroit fut présent devant
nous en personnes et pour ce personnellement establi Artur Lesmaes seigneur
de Kervernyou, lequel fut et est congnoissant & confessant tenir en
proche seigneurie de ligence à foy et debvoir de rachat quand
le cas advient, de et soubs le Roy nostre Sire [François Ier], usufructuaire
de la duché de Bretaigne, père et légitime administrateur
de Monseigneur le Dauphin [futur Henri II], duc et seigneur propriétaire dudit duché, le
manoir de Kervernyou, molin, boys, parcs, praés, preries, garennes,
terres chaudes et froydes o [avec] ses issues et appartenances, sits en la
paroisse d'Elyent, ferant d'un endroit sur la Rivière de Set [Stêr-Jed],
d'aultre endroit sur terres de nostre dite Court, d'aultre endroit sur
terres de Monseigneur l'évêque de Cornouaille en la paroisse de Coray,
d'aultre endroit sur terres de Monseigneur de Tréanna et de Monseigneur de Lanros.
Ledit manoir tenu en partie par ledit Lesmaes et par Yvon le Pappe~, Guillaume
Le Sech, Guezenec et Yvon Le Briz, Roland Monfort, Yvon Le
Lagadec & Danyel Le Cerff ses hommes? Et ce pour en poïer
par chacun an à chacun jour et feste de Monsieur Sainct Gille, de cheffrante
la somme de vingt et cinq souls monnoie de cheffrante. Et aussy poyer le
nombre de troys quarterons fourment chacun an à chacun jour et feste
de Notre-Dame de la Chandeleur par le fié du ramaige du seigneur de
Kermynyhy au recepveur de ladite Court à la Chandeleur chacun an. À
cause desquelx heritaiges a, ledit Lesmaes, promys et juré obéyr
à ladite Court sellon la nature du fié, droict et coustumes de ladite
seigneurie sont au terrouer ?, protestant ledit Lesmaes expressément l'augmenter
ou diminuer audit adveu et baillée par aultre temps si aulcunes chosses
[il] avoit obmys à y raporter par ignorance ou aultrement. Et
tout ce que dessus, tenir, fournir et accomplir, promect et jura ledit Lesmaes
par son serment et sur l'obligation de ses biens ne venir jamays encontre.
Et se son assentement y fut par nostre dite Court condampné à sa prière
et requeste. Donné tesmoign de ce, le seau [sceau] establi aux contracts de
nostre dite Court a ceste mys. Ce fust faict et gréé ou bailluage
de Rospreden en l'auditoire d'icelle le quatorzième jour
de novembre l'an mil cinq cents trente ouict.
Constat en cancelé : sont au terrouer.
[signatures de :]
X. Blohio, passe
J. Briz, passe
|
