| Source : FRAD044 B 1237 [i]
[f° 338 recto]
Jan de SAINCT PERN, Seigneur du Lattay et de Sainct Jean, &ca, Conseiller du Roy, maistre ordinaire en sa Chambre des Comptes de Bretaigne, commissaire par elle député pour la Refformation des domaynes de sa magesté ès Jurisdictions de Concq, Fouesnant & Rospreden ; et escuyer Yves de QUELEN, sieur de la Crecholain, aussi conseiller du Roy et son séneschal desdites jurisdictions, Scavoir faisons que sur la remonstrance nous faicte par escuyer Claude de KERBLEIZEC procureur du Roy des mesmes jurisdictions, que les subjetcs du Roy en icelles, recepvoint de grandes oppressions par les fermiers et gentilshommes du pays pour le payement de leurs rantes par grains, faulte d'avoir une mesure certaine aresté et l'himittéé ; Nous requeroit, sur ce que lesdictes rantes se debvoict à diverses mesures ; de minots, reñés, quarterons, mines et combles ; et que encore, que de ses mesures il y en avoit de differantes, sellon les differants membres et chastellenyes de cette jurisdiction ; et qu'il n'y avoict aulcun ethelon fors deux qui sont au boult de la halle dudict Concq , dont l'on ignore présantement le nom. Qu'il nous pleust procéder à la refformation, esclaircissement et certitudes desdictes mesures. À quoy faisant droict , nous auryons ordonné que en sa présance seroict par nous faict extraict des mesures portés par les entiens comptes randus dans la Chambre des Comptes de ce pays , suivant et aux fins desquelles les grains deubs au roy auroict estés payés de tous temps.
Ce que nous auryons faict en la manière que s'ensuilt :
Réduisant le tonneau d'ont sera cy apprès parlé au tonneau de Nantes ; ayants estés dubments infformés que le tonneau de Concq et de Nantes ce rapportent, et les vingt mesures combles du ethellon [f° 338 verso] qui est au boult de la halle de Concq font les dix septiers et le tonneau de Nantes.
[ On oublie le septier ensuite ! ]
Auryons extraict le compte randu par
- Ernault SAUVAGE recepveur desdictes chastellenyes clos le vingt et deuxiesme juillet mil trois cens quatre vingt et unze ;
- celuy de Jan de TRÉANNA clos le quinziesme juing an mil quatre cens et neuff ;
- celluy de Nicollas DU VAL clos le vingt et troisiesme janvier mil cincq cents houict ;
- le compte troiziesme de Allain ROLLAND clos le houictiesme apvril an mil cincq cens dix houict ;
- celui de Guillaume ROLLAND clos le dix septiesme juin mil cincq cens trante et un ;
- celui de Pierre du MÉNEZ clos le douziesme décembre an mil cincq cens quarante et neuff.
Par lesquels nous auryons veu
- que la mesure appelé comble, les dix houict font le tonneau ;
- que la mesure appelé renéé comble, les vingt font le tonneau ;
- que la mesure appelé renée raze les vingt et quatre font le tonneau ;
- que la mesure appellée minot les trente et deux font le tonneau ;
- que la mesure appelée quarteron, il en fault quarante et houict pour faire le tonneau ; et douze escuellées pour faire le quarteron ;
- et la mine de Concq les deux font le comble et les dix(-huit ?) combles le tonneau ;
- la mine de Fouesnant les trois font le comble ;
- et la mine de Scaër, il en fault cincq pour le dit comble ;
et ayant faict en nos présances gauger l 'ethelon estant au boult de la halle que nous avons trouvé my-party au premier d'ermynes, au cheff chargé de fleurs de lys et au second d'un huchet que l'on nous a dict estre armes de la maison de Cheffdubois Thomine en la paroesse de Lanryec, sergeant voyier de la chastellenye de Concq avecque les mesures que les marchands se servent pour vandre et achepter leurs bledz au tonneau ainsy [folio 339 recto] qu'il est cy devant raporté ; et à la mesme proportion que ladicte renée comble ; pour estre à l'advenir les rantes payés suivant lesdites mesures avecque deffances aux recepveurs, fermiers et subjects de sa magesté de se servir d'autres mesures pour la recepte ny payement desdictes rantes, sur les painnes quy y eschééent ;
Pour estre desdictes mesures, mis [soubs la halle de Rospreden]
- un comble, ( 1 / 18 )
- un quarteron, ( 1 / 48 )
- une mine dont les cincq feront le comble ( 1 / 90 )
- et une escuellé dont les douze feront le quarteron ( 1 / 576 )
soubs la halle de Rospreden,
et soubs la halle de Concq lesdicts etelons y estants d'ont
- l'un servira de renée comble les vingt faisant le tonneau ( 1 / 20 )
- et l'autre de demy renée comble. ( 1 / 40 ? )
Davantage y sera mis
- une renée raze d'ont les vingt et quatre feront le tonneau, ( 1 / 24 )
- et un minot dont les trante et deux feront le tonneau , ( 1 / 32 )
- et une mine d'ont les deux feront le comble ; et les dix houict comble le tonneau ; ( 1 / 36 )
et à la Forest Fouesnant soubs le chapiteau de l'esglize,
- un comble d'ont dix houict feront le tonneau ( 1 / 18 )
- et une mine les trois faisans le comble ; ( 1 / 54 )
et le quarteron et la mine de Fouesnant estant la mesme chose.
Sur lesquelles mesures sera gravé en taille le nom d'icelles à fin qu'ils n'y ait doresnavant de mesprinze d'une mesure pour l'autre.
Et d'aultant que n'avons à tarder suffizamment le temps nécessaire pour voir faire lesdictes mesures nous en avons donné commission au sieur séneschal, de l'ordonnance duquel elles seront gaugés en présance du procureur du Roy.
Faict à Concq le sixiesme juillet mil six cents quarante et troys.
[ Sur le folio 339 verso, signatures de : ]
Jan de Sainct Pern
Yves de Quelen,
Sénéchal
Claude de Kerbleizec,
Procureur du Roy
|
